હિસાબો થાય છે....!!!

આખરી   શ્વાસે    તકાજો   થાય    છે,
પાપપુણ્યોના    હિસાબો    થાય   છે.
         
જેટલા     આપું     જવાબો     જાતને,
એટલાં   સામે   સવાલો    થાય    છે.
                                                
ના થઈ  શકયા  જે  ખુલ્લી  આંખથી,
બંધ   આંખોથી   પ્રવાસો   થાય   છે.

શું છે ? આ જીવનમરણ, એ જાણવા,
રોજ   સ્વપ્ને   રાતવાસો   થાય   છે.

જીવ    માફક    સાચવું    એને   છતાં,
જીવ ! મરણ આવ્યે પરાયો થાય છે.

સૌ  વિચારો  જેમનાં પણ  હો  બુલંદ,
એમની   વાતે    રિવાજો   થાય   છે.
                                                   
-અશોક વાવડીયા "રોચક"

લલચાઇ ગ્યા...!!!

મત્લા ને મક્તા જોઇને  ગભરાઇ  ગ્યા,
છંદોના બંધારણમાં પણ અટવાઇ ગ્યા,

ફૂલોને,  કેવા  સ્પર્શ  લાગ્યા  હાથોના.!
કે, બાજુમાં  કાંટા  ઉભા  શરમાઇ  ગ્યા.

એવી  વિરહની   વેદના  ચાલે   સખી,
ચહેરા ગુલાબી ગોટા સમ કરમાઇ ગ્યા.

સ્વપ્ને  ફરી   છે  યાદ  એવી  એમની,
એ સામે આવ્યા સમજીને હરખાઇ ગ્યા.

મળશે   સુરક્ષા, જો   મને   ચૂંટો  ફરી;
આવી જ વાતોથી અમે લલચાઇ ગ્યા.

-અશોક વાવડીયા "રોચક"